盏鬼的肇庆话（盞鬼一到十粵語口頭禪）

盏鬼的肇庆话（盞鬼一到十粵語口頭禪）例如係其他人冇辦法理解嘅小Pe最鐘意講傻豬嚟嘎仲有啲口頭禪

粵語博大精深

求其一句話嘅含義

都令人佩服到五體投地

而你嘅口頭禪又係咩？

小Pe最鐘意講

傻豬嚟嘎

仲有啲口頭禪

係其他人冇辦法理解嘅

例如

二指長過公唔死都一世窮

拖拖拉拉實食齋扭扭另另正乸型

癡癡呆呆坐埋一臺昂昂居居圍埋一堆

外地人：你噏乜春呀？？

就係呢啲令人聽起身

暈坨坨嘅粵語口頭禪

你又識講幾句？？

喺粵語入面

幾隻數字就可以組成一句口頭禪

從1講到10

妙語連珠，足以令你o曬大嘴

一齊嚟睇睇！

一五一十

解釋

一般指人完完整整，將事實從頭到尾全部講曬出嚟。

例句

當你做錯咗事穿煲之後，媽子一般會咁樣質問你：到底乜回事，你最好一五一十同我講清楚呀！

二五仔

解釋

指告密者、叛徒、內奸。

例句

你個二五仔，竟然出賣我！

二打六

解釋

打有和、加嘅意思，即二同埋六合起身係八，唔夠十。指一個人做事不夠十足，或身份無足輕重，就好似跑龍套。

例句

如果一間公司嘅員工都係啲「二打六」貨色，咁恐怕呢間公司都好難大展宏圖！

三唔識七

解釋

指互不相識、唔熟。

例句

傾咩啊，

我同佢都三唔識七嘅。

唔理三七二十一

解釋

指無論咩情況，都要去做，即使淪落到最差嘅結局，都在所不辭。

例句

唔理三七二十一喇，做住先。

三口六面

解釋

「三口六面」後面通常跟「講清楚」，指大家約出嚟當面解釋清楚。

例句

一於三口六面出嚟講清楚。

三姑六婆

解釋

原本指嘅係古代中國民間女性嘅幾種職業。現在則常指各式市井女性，通常指茶余飯後八卦料都係從佢哋把嘴度爆出嚟。

例句

佢哋班三姑六婆，日日都好多嘢八嘎！

四四六六

解釋

形容人處理事情有條有理，也可以形容攤牌、講得清清楚楚。

例句

我唔理啊，

反正你快啲四四六六拆掂佢。

鬼五馬六

解釋

指搞怪，唔正經，古靈精怪。

例句

成日將D嘢搞到「鬼五馬六」咁，都唔知為乜。

七國咁亂

解釋

表示秩序很亂，

亂曬大龍，

例如咁樣

例句

哇你間七國咁亂，

仲唔快啲執下佢！

九唔搭八

解釋

指講嘢冇邏輯或偏離主題。或者指一個人講嘢啰啰嗦嗦，講咗好耐你都唔知佢講緊乜，咁你就可以話佢九唔搭八。

例句

都唔知佢噏乜，九唔搭八。

十問九唔應

解釋

指問嚟問去都得唔到答復。

例句

咪玩手機啦，

次次都十問九唔應！

亂噏廿四

解釋

形容人胡說八道。

例句

你咪理佢亂噏廿四喇，

都傻傻哋嘅！

睇完有冇學到幾個咧？

或者你仲有冇補充嘅？

慢慢諗！

唔使急，最緊要快！

圖片來源：TVB截圖、騰訊視頻截圖、攝圖網

素材來源：網絡

版權屬於原作者

編輯撰寫：小Pe

本號原創文章，未經授權，不得轉載